எங்களை பற்றி
மாநகர் போக்குவரத்துக் கழகம் [சென்னை] வரையறுக்கப்பட்டது என்பது நிறுவனங்கள் சட்டம், 1956 இன் கீழ் பதிவுசெய்யப்பட்ட தமிழ்நாடு அரசு நிறுவனமாகும். இது தமிழ்நாடு அரசால் நியமிக்கப்பட்ட இயக்குநர்கள் குழுவால் நிர்வகிக்கப்படுகிறது. சென்னை மாநகரில் பொது போக்குவரத்து 100% தேசியமயமாக்கப்பட்டுள்ளது. மாநகர் போக்குவரத்துக் கழகம், சென்னை மாநகர்ப் பகுதி முழுவதும் உள்ள பொதுமக்களுக்கு சேவை செய்து வருகிறது, இதின்இயக்க எல்லை 3929 சதுர கிலோ மீட்டர் பரப்பளவு ஆகும்.

வரலாறு
இந்தியா சுதந்திர அடைந்த பின்னர், 1947 - ல் சென்னை மாநகரத்தில் தனியார் பயணிகள் பேருந்து போக்குவரத்து நடைபெற்ற காலத்தில், 30 பேருந்துகளை அரசுத்துறை சார்ந்த அமைப்பின் கீழ் இயக்குவதற்கு அப்போதைய அரசாங்கம் நடவடிக்கை எடுத்தது. பேருந்து போக்குவரத்து சென்னை மாநில போக்குவரத்து துறையின் கட்டுப்பாட்டில் இருந்தது.

1972 ஆம் ஆண்டில், சமூகப் பொறுப்புகளை தியாகம் செய்யாமல் வணிக அணுகுமுறையை புகுத்துவதற்காக போக்குவரத்து துறை அமைப்பு ஒரு நிறுவன அமைப்பாக மாற்றப்பட்டது. பல்லவன் போக்குவரத்து கழகம் வரையறுக்கப்பட்டது, கம்பெனி சட்டம் 1956ன் கீழ், தமிழ்நாடு அரசால் 01.01.1972 அன்று உருவாக்கபட்டு 1029 பேருந்துகளைக் கொண்டு இயக்கப்பட்டது.

பொதுமக்களின் தேவைகளுக்கு ஏற்ப பேருந்துகளின் எண்ணிக்கை படிப்படியாக அதிகரித்து 01.01.1994 அன்று 2332ஐ எட்டியது. பேருந்துகள் எண்ணிக்கை அதிகரித்ததால் பேருந்து இயக்குதலில் உள்ள சிரமங்களை எளிதாக்கவும், பேருந்து இயக்கத்தினை மேம்படுத்திடவும் பல்லவன் போக்குவரத்துக் கழகத்தினை தமிழ்நாடு அரசு இரண்டாக பிரித்து, ஓர் புதிய போக்குவரத்துக் கழகம் டாக்டர் அம்பேத்கார் போக்குவரத்துக் கழகம் என பெயரிடப்பட்டு 19.01.1994 முதல் உருவாக்கப்பட்டது.

சென்னை மாநகரில் உள்ள ஈ.வெ.ரா ராமசாமி சாலையின் தெற்குபுறப் பகுதிகள் பல்லவன் போக்குவரத்துக் கழக இயக்கப் பகுதியில் வந்தது. சென்னை மாநகரில் உள்ள ஈ.வெ.ராமசாமி சாலையின் வடக்குபுறப் பகுதிகள் (ஈ.வெ.ரா. பெரியார் சாலை உட்பட) டாக்டர் அம்பேத்கார் போக்குவரத்துக் கழகத்தின் இயக்கப் பகுதிகளுக்குள் வந்தது.

பல்லவன் போக்குவரத்துக் கழகம் மற்றும் டாக்டர் அம்பேத்கார் போக்குவரத்துக் கழகம் இணைக்கப்பட்டு ஒருங்கினைந்த மாநகர் போக்குவரத்துக் கழகம் (சென்னை) வரையறுக்கப்பட்டது என்ற பெயரில் 10.01.2001 முதல் செயல்பாட்டினை தொடங்கி செயல்பட்டு வருகிறது.